Vonandi bara byrjunin...

Mikið hefði ég viljað sjá þessa bölvuðu stýrivexti lækka mikið meira en maður verður bara að sætta sig við það sem maður fær...
Allt hjálpar eins og staðan er núna og vonandi munu vextirnir lækka meira þann 6. nóvember. Við verðum að minnsta kosti að krossa putta og tær og vona það besta.

Annars skil ég ekki af hverju ekki er búið að skipta út þessum bankastjórum þarna í Seðlabankanum!!! Finnst þeir ekkert hafa þarna að gera og ekki vera að gera nokkurn skapaðan hlut af viti... En, Geir bolar auðvitað ekki út sínum besta vini, Dabba kóngi...
Þá væri hann líklega orðinn feigur í Sjálfstæðisflokknum!!!

Stýrivextir lækkaðir

Ég var klukkuð...

Af eiginmanninum hérna um daginn og það er eins gott að svara spurningunum...
Ég skora á Súpermömmu (Elísabet), Lenu, Steinunni og Svönu að svara spurningunum!!!

Fjögur störf sem ég hef unnið um ævina

1. Þjónustufulltrúi hjá Tollstjóranum í Reykjavík.
2. Símadama hjá Landspítala Háskólasjúkrahúsi á aðalskiptiborði.
3. Verkstjóri á saumastofu Bergiðjunnar, Kleppi.
4. Upplýsingafulltrúi hjá Markhúsinu.

Fjórar bíómyndir sem ég held uppá

1. Briget Jones Diary.
2. National Lampoons Christmas Vacation (Horfi alltaf á hana einu sinni fyrir hver jól).
3. Erin Brockovich.
4. Mamma Mia.

Fjórir staðir sem ég hef búið á

1. Reykjavík.
2. Suðureyri.
3. Hafnarfjörður.
4. Marnardal, Noregi. 

Fjórir sjónvarpsþættir sem mér líkar

1. House.
2. Grey's Anatomy.
3. Wild at Heart.
4. What about Brian.

Fjórir staðir sem ég hef heimsótt í fríum

1. Minneapolis.
2. London.
3. Toronto.
4. St. Petersburg.

Fjórar síður sem ég skoða daglega fyrir utan að blogga

1. mbl.is
2. visir.is
3. scrapbook.is
4. facebook.com

Fernt sem ég held uppá “matarkyns”

1. Pastarétturinn hennar Huldu ömmu.
2. Japanski kjúklingarétturinn hans Viðars.
3. Grillað lambalæri með fullt af hvítlauk og kryddjurtum.
4. Skyr með rjóma.

Fjórar bækur sem ég hef lesið oft

1. Waiting to Exhale.
2. Ísfólkið.
3. Karíus og Baktus.
4. Þyrnirós.

Allt á leið til fjandans...

Já, ég held að það sé óhætt að segja það að það sé allt á leið til fjandans!!!
Viðskiptabankinn okkar Viðars, Landsbankinn, orðinn gjaldþrota eða því sem næst og Fjármálaeftirlitið búið að yfirtaka hann.
Ég heyrði það í gær að ef neyðarlögin yrðu ekki samþykkt að þá yrði bankinn gjaldþrota, eitthvað sem ég tók með smá fyrirvara en nú er það orðin staðreynd.
Vildi eiginlega samt óska þess innst inni að bankinn hefði verið gerður gjaldþrota... Þá hefði maður líklega losnað við lánin sem eru að sliga mann...
Það vill reyndar til að við erum svo heppin að eiga engan pening og skulda helling, sem betur fer eiginlega og heppin erum við að vera ekki með nein myntkörfulán.
Og við erum líka fyllilega sátt við það núna að eiga ekki íbúð heldur.

Annars hef ég líklega dottið illilega á hausinn í gær...
Af hverju??? Jú, ég fór og keypti mér árskort í líkamsrækt hjá Nautilus!!!
Ég held svei mér þá að ég hljóti að vera feig...

FME stýrir Landsbankanum

Button farin og fjölskyldan miður sín...

Já, Button litla er farin frá okkur

Á þriðjudagskvöldið kom Bjarni og Guðrún (konan sem á hana) og náðu í hana. Button varð ósköp glöð að sjá Guðrúnu og greinilegt að hún þekkti hana eitthvað.

Okkur er farið að þykja óendanlega vænt um þetta litla stýri, enda ekki annað hægt - hún er bara svo yndisleg.

Við erum búin að taka hana í mikla þjálfun, kenna henni að setjast og heilsa og venja hana af því að gelta á allt og alla. Ég segi það ekki að hún gelti nú ekki svo mikið en hún gelti á alla sem gengu framhjá húsinu og við náðum að venja hana af því, svona að mestu leyti.

 

Við meigum samt alltaf hafa samband við Guðrúnu og fá að hitta Button litlu og jafnvel fara með hana í göngutúra og svoleiðis og hver veit nema við eigum eftir að nýta okkur það. Þær voru orðnar svo miklir vinir, Button og Ástrós Erla og maður var orðinn svo vanur því að hún fylgdi manni til dyra þegar að maður fór í vinnuna á morgnana og fagnaði manni þegar að maður kom heim...

Svo er engin Button sem biður mann um að henda bolta eða ná í bolta undir sófaborð og heldur engin Button sem legst til fóta hjá manni á kvöldin þegar maður fer upp í rúm. Já, þetta eru tómlegir dagar

Ætli það endi ekki með því að við fáum okkur hund?!

The Boys

Er það bara ég sem man eftir þeim bræðrum Arnari og Rúnari???
Men hvað mér fannst þeir sætir á sínum tíma og vá þeir gátu sungið líka!!!
Ég verð nú að viðurkenna það að þeir eru ennþá sætir...
Samt ekki eins sætir og minn ektamaður...
Fann hérna nýlegt viðtal við þá í norska Dagbladet, viðtalið er auðvitað á norsku en gaman að sjá þetta samt og hvernig þeir líta út í dag

http://www.kjendis.no/2008/07/20/541277.html

Sólbruni helgarinnar

Jú, jú... Við fórum í útilegu um helgina. Við byrjuðum á því að keyra í Þrastaskóg á föstudaginn en fannst frekar lítið við að vera fyrir Prinsessuna svo við ákváðum að fara upp að Úlfljótsvatni.
Þegar þangað kom var skýjað þar, hávaðarok og þvílíka magnið af flugu sem var þar!!! Ég hélt ég yrði ekki eldri.

Eins og mín var von og vísa var ég ákveðin í að láta það ganga að vera þarna þó ég hefði engan sérstakan áhuga á því, allt gert til að Prinsessan litla hefði eitthvað við að vera. Eftir því sem ég reyndi að sannfæra mig meira, þeim mun meira runnu á mig tvær grímur. Og fyrir rest kom hugsunin: "Hvernig í fjandanum eigum við að tjalda tjaldinu???"

Svo það varð úr að við keyrðum aftur í Þrastaskóg, þar sem var minna af flugu, heiðskírt og nánast logn.

Fundum okkur góðan stað til að tjalda á og komum okkur vel fyrir. Eins og venjulega með þetta tjald okkar, gekk frekar erfiðlega að tjalda því en það tókst á endanum. Við hljótum að vera algjörir kjánar að lenda alltaf í vandræðum með þetta tjald... Við lærum þetta vonandi á endanum, líklega þegar að við ákveðum að skipta um tjald

Við ákváðum að taka með okkur litla gaseldavél sem er komin til ára sinna en svínvirkar ennþá
Við tókum hana traustataki frá mömmu enda hefur hún ekki verið notuð í mörg herrans ár og tími til kominn að endurvekja hana greyið. Mér skylst að nýjar svona vélar séu að kosta í dag 20-25 þúsund!!!
Svo ég er að spara á þessum síðustu og verstu tímum.

Eldavélin var svo notuð til að hita vatn í kaffi fyrir húsbóndann og eins til að elda kvöldmatinn á föstudagskvöldið og steikja hamborgara á laugardaginn í hádeginu.

Prinsessan skemmti sér konunglega. Hún fann sér vinkonur um leið og svo höfðum við tekið með okkur dót fyrir hana, bæði sandkassadót, litabók og liti og bolta, þannig að hún hefði pottþétt eitthvað að gera.

Hún átti reyndar erfitt með að sofna á föstudagskvöldið enda var töluvert bjart eins og venja er á Íslandi á sumrin og hún kvartaði sáran undan því að hún gæti ekki farið að sofa fyrr en tunglið væri komið. En hún sofnaði fyrir rest og svaf vært á milli okkar um nóttina.

Á laugardeginum vöknuðum við og þá var alveg heiðskírt og varla bærðust laufin á trjánum. Hreint út sagt geggjað veður
Við vorum bara í svaka heitapotti þarna og höfðum það náðugt. Lífið var alveg sérstaklega dásamlegt á þessum tímapunkti. Prinsessan var bara á kvartbuxum og hlírabol og lék á alls oddi. Uppúr kl 14.30 ákváðum við að fara í sund, svo við skelltum okkur á Selfoss og í sundlaugina þar.

Ég verð að segja Selfyssingum til hróss að sundlaugin þeirra er algjört æði og algjör paradís fyrir börn!!!
Prinsessan elskaði laugina og sérstaklega Gottarennibrautina. Þetta var æðisleg afslöppun þó svo að það blési svolítið við laugina. Þegar til baka var komið þá grilluðum við kótilettur og borðuðum með piknik franskar, kartöflusalat, hrásalat og sósur og svo var drukkið gos og safi með. Æðislega gott og við lágum á meltunni í smá tíma á eftir.

Á sunnudagsmorgninum fór Viðar svo í Þingvallavatn að veiða og kom til baka um kl 11 með 10 fiska!!!
Það er nokkuð augljóst að minn maður veit orðið hvar hægt er að fá fisk þarna og hann veit hvað þeir vilja.
Ég er afskaplega stolt af mínum manni

Eftir að hann kom til baka fórum við að taka saman og svo fengum við okkur að borða í Þrastalundi. Rándýrir hamborgarar en hryllilega góðir samt sem áður.

Svo var ekið heim á leið og við náðum að vera á undan umferðinni í bæinn. Það var ansi þreytt fjölskylda sem kom heim á Hringbrautina um kl 14.30 á sunnudag og illilega brunnin!!! 
Nefið á Viðari er eins og glóandi eldhnöttur og það er hægt að steikja egg á bakinu á mér. En þrátt fyrir það var ferðin æðisleg og ég hefði ekki getað beðið um betri ferð.

Næsta ferð er svo fyrirhuguð um Verslunarmannahelgina en þá ætlum við að fara í sveitina hennar Huldu ömmu, Miðhraun í Miklaholtshrepp á Snæfellsnesi.

Sólarfrí og útilega

Já, í dag tek ég mér sólarfrí í vinnunni

Tollstjóri gefur öllum starfsmönnum sínum 1 dag í sólarfrí í sumar og ég ákvað fyrir 3 vikum síðan að taka út þetta sumarfrí í dag

Er svo búin að vera með krosslagða fingur allan tímann í þeirri vona að veður yrði gott svo hægt yrði að gera eitthvað skemmtilegt. Tilhugsunin um að vera í sólarfríi í ausandi rigningu var ekki alveg að gera sig í mínum bókum...

Og alla vikuna hef ég beðið spennt eftir veðurspá helgarinnar og vonast eftir góðu veðri svo hægt yrði að fara í útilegu.

Svo þegar nokkuð öruggt var orðið að veðrið yrði gott þá var ákveðið að skella sér í útilegu, Ástrós Erlu til mikillar gleði og ánægju, að sjálfsögðu
Hún er búin að tala um útilegu í allt sumar og loksins er komið að því að við skellum okkur út úr bænum.

Við erum ekki endanlega búin að ákveða hvert ferðinni er heitið en 2 staðir koma til greina: Úlfljótsvatn og Þrastaskógur. Það verður að teljast líklegt að fyrri kosturinn verði fyrir valinu enda mikið um að vera þar fyrir börn og svo er stutt fyrir Viðar í Þingvallavatn þar sem hann getur farið í veiði á sunnudagsmorguninn. Hmmm... Það mætti halda að ég væri ekki að fara með, miðað við þetta. Ekkert verið að hugsa um það hvort eitthvað höfði til mín eða ekki...
En á meðan að ég hef einhverja handavinnu, þá líður mér vel

Annars er það svo að mér finnst útilegur almennt séð vera mjög skemmtilegar. Við erum nú ekki svo vel stæð að við eigum orðið skuldahala (tjaldvagn, fellihýsi, hjólhýsi) svo við ferðumst bara með góða gamla tjaldið!!!
Við eigum orðið fínasta tjald, vindsængur, sóltjald og sitthvað fleira. Við vorum svo heppin að mamma átti þessa fínu gaseldavél með 2 hellum og lítinn gaskút (fullan) og erum búin að ættleiða það.
Við eigum líka orðið stóla og borð svo það ætti ekki að væsa um okkur í útilegunni.

Button kemur að sjálfsögðu með en það fer að styttast í að hún fari frá okkur. Eigandinn kemur heim frá Bandaríkjunum á miðvikudaginn í næstu viku og þá verður hún sótt...
Það verður erfitt fyrir okkur enda er hún orðin hluti af fjölskyldunni okkar... 

Minn betri helmingur...

Hann Viðar minn er 32 ára í dag   

Innilega til hamingju með daginn, elsku ástin mín eina   

Hérna eru nokkrar myndir af afmælisbarni dagsins:

8 mánaða:

Gúmmítöffari:

Í dag er hann orðinn fullorðinn en samt alltaf sami töffarinn:

Bómullarbrúðkaup (2.ára brúðkaupsafmæli)

Í gær áttum við Viðar 2. ára brúðkaupsafmæli, svokallað Bómullarbrúðkaup.
Ég velti því fyrir mér allan daginn hvað ég ætti að gefa bóndanum í tilefni dagsins, sem væri úr bómull!!! Mín besta og jafnframt hallærislegasta hugmynd, var að gefa honum viskastykki
En ég vissi að það myndi ekki falla í kramið svo ég var gjörsamlega hugmyndasnauð.
Þá kom Erla Anna, vinnufélagi minn, mér til bjargar!!!
Gefa manninum bómullarhandklæði
Svo ég skellti mér í Rúmfatalagerinn eftir vinnu og keypti stórt, túrkisblátt baðhandklæði handa manninum!!! Fór svo í blómabúð og keypti rauða rós sem ég lét binda við handklæðið
Það var ekki að sökum að spyrja að þetta sló í gegn

Þegar ég kom heim beið eftir mér heitt bað og hvítvínsglas og ég kom ekki nálægt eldamennskunni. Ég hins vegar gekk frá matnum og svo fékk ég táslunudd síðar um kvöldið frá Viðari og Ástrós Erlu

Hérna eru svo myndir frá brúðkaupsdeginum:

Sumarfrí nálgast óðfluga

Já, nú fer heldur betur að styttast í sumarfrí!!!
Og ég get ekki annað sagt en að það sé mjög langþráð sumarfrí
Viðar er búinn að panta miða fyrir okkur út til Svíþjóðar á þriðjudaginn 1. júlí og heim aftur þann 8. júlí og svo verðum við bara að sjá til hvenær við komumst í loftið vegna verkfalls Flugumferðarstjóra.

Annars erum við þvílíkt fegin núna.
Eins og einhverjir vita sem lesa þetta blogg mitt, þá er Viðar starfsmaður Icelandair. Já, sama Icelandair og er að segja upp í stórum stíl starfsfólki sínu vegna samdráttar.
Viðar er flugstaðlasérfræðingur (flight standards specialist) og vinnur á skrifstofu yfirflugstjóra.
Hann og allir í hans deild halda vinnunni, sem betur fer.
Deildin er rekin á lágmarks mannskap nú þegar og því ekki hægt að segja neinum upp. Auk þess eru allir starfsmenn mjög sérhæfðir og því enginn sem gengur svo auðveldlega í störf þeirra.

Hundurinn Button hefur það fínt. Maginn kominn í lag og hún leikur við hvern sinn fingur!!!
Við héldum reyndar um daginn að hún væri komin með kvef en svo hnerraði hún á mánudagskvöldið og þá kom grasbútur út úr nefinu á henni!!!
Svo hún hafði greinilega tekið gras í nefið...

Annars dafnar Ástrós Erla eins og blóm í eggi þessa dagana!!!
Hún elskar sólina og góða veðrið og er bara í kjólum og pilsum á leikskólanum upp á hvern einasta dag núna.

Við fórum í sund á sunnudaginn og svona líka skaðbrunnum foreldrarnir en Ástrós Erla brosti bara sínu blíðasta, alsæl með að fara í sund og varð svo bara brún!!!
Þvílíkt óréttlæti, ég segi nú ekki annað!!!
Við erum að tala um það að við Viðar erum eins og ofsteiktir karfar á þurru landi og svo aum í öxlum að við gátum varla sofið aðfararnótt mánudagsins og það var sama hvað við settum á okkur, það var horfið inn í húðina áður en við vorum búin að klára að bera á okkur!!!
Já, þetta kennir okkur að bera á okkur vatnshelda sólarvörn áður en við förum næst í sund í sólinni!!!

Annars ætla ég að setja inn 2 myndir í portfolio myndamöppuna mína af blómi og lyngi. Tók blómamyndina á 17. júní og hina hérna eitthvert kvöldið þegar við fórum með Button í göngutúr.