Afmælisbarn gærdagsins og fleira

Afmælisbarn gærdagsins er án efa hann Erling Óskar eða Elli eins og hann er kallaður í dag í daglegu tali.
Hann er semsagt yngsti bróðir minn af þessum 6 bræðrum sem ég á og hann er orðinn 16 ára!!!
Ég gleymi því ekki þegar að mamma sagði mér að hún væri aftur orðin ólétt, í 5. skiptið. Ég varð alveg snarbrjáluð og tilkynnti henni það að ef að þetta yrði enn einn strákurinn þá væri ég sko farin og hún gæti bara drullast til að passa kvikindið sjálf!!! Ég væri hætt að vera barnapían
Svo fæddist þessi gullmoli og auðvitað rann mér reiðin og ég passaði hann og hjálpaði mömmu að ala hann upp og ég verð að segja það að ég gæti ekki verið stoltari af litla bróður.
Hann stundar nám við MH (kláraði 9. og 10. bekk saman í fyrra) á IB braut og kláraði árið núna með 9,44 í meðaleinkunn!!!

Hann gisti annars hjá mér í fyrrinótt og á meðan að hann fór í bíó með Erlu frænku á mánudagskvöldið, þá skellti ég í eina súkkulaðiköku og skellti svo á hana Betty Crocker kremi sem ég fann uppi í skáp. Ég fann 3 tegundir (súkkulaði, vanillu og karamellu) og notaði það á kökuna. 1/3 var með súkkulaðikremi, 1/3 með vanillukremi og 1/3 með karamellukremi. Svo var kakan skreytt með kókos, möndluflögum og hlaupböngsum
Ástrós Erla tilkynnti svo frænda sínum í gærmorgun að hann mætti ekki fara inn í eldhús og ég var fljót að leiðrétta það enda var kakan inni í geymslu.
Hann rauk inn í eldhús og kom svo vonsvikinn til baka:
"ohhh, ég var að vona að þið væruð búin að baka köku handa mér eða amerískar pönnukökur  í morgunmat."
Ég svaraði: "nei, þú færð bara ristað brauð eins og við hin."
Hann sagði: "ok, en áttu papriku?"
Ég: "nei, hún kláraðist í gær."
Svo laumaðist ég inn í eldhús, Viðar náði í kökuna og við settum á hana 4 kerti og kveiktum á þeim.
Fórum svo með kökuna inn í stofu til hans syngjandi afmælissönginn og hann gjörsamlega missti andlitið!!! Við náðum hönum algjörlega
Og auðvitað varð hann alsæll og ánægður með súkkulaðiköku og ískalda mjólk í morgunmat

Smá blogg...

... Í tilefni dagsins
Button er búin að vera veik undanfarna daga. Fékk svona svakalega í magann greyið og er bara búin að vera með niðurgang og skemmtilegheit á eldhúsgólfið undanfarnar nætur...
Ég sver það, eldhúsgólfið mitt hefur aldrei verið eins HREINT!!! Enda skúrað á hverjum einasta degi 3-4 daga í röð...
Við Ingunn vinkona kíktum með hana til dýralæknis í Garðabænum á laugardag og það kom í ljós að hún var með stíflaða endaþarmskirtla og þeir voru að valda þessu
Hún fékk meðal, nýjan mat og fullt af hlýju og knúsi og henni er loksins batnað!!!
Farin að kúka eðlilegum kúk okkur til mikillar ánægju. Hver hefði trúað því að kúkur gæti verið svona merkilegur??? Og að eðlilegur kúkur gæti kætt mann svona mikið???
Ótrúlegt alveg.

Við fórum annars á Víðistaðatúnið í gær, í tilefni Þjóðhátíðardagsins
Ástrós Erla fékk að fara í hoppukastala og svo fékk hún stórt sleikjósnuð og risastóra gasblöðru með Strawberry Shortcake stelpunni.
Núna svífur þessi risastóra blaðra um loftið í herberginu hjá dótturinni.
Við elduðum svo Mangóchutney kjúkling og hrísgrjón í kvöldmatinn a la Hulda. Held ég noti sjaldan jafnmargar kryddtegundir í matargerð eins og þegar ég er að elda þennan kjúklingarétt.

Viðar er farinn til Madrid.
Ég öfunda hann ekki lítið sko!!!
Hann fór í morgun og er væntanlegur aftur á föstudaginn. Vinnuferð að sjálfsögðu
Alla jafna eru 3 menn sendir í svona ferðir en þar sem Icelandair er að spara þá er hann sendur einn en fær í hendurnar marga Checklista sem hann þarf að fá svör við, fyrir alla hina. Nóg að gera semsagt.
Hann flýgur til London og þaðan til Madrid. Verður á hóteli í nótt og svo á fundi á morgun. Og svo er áætlað að hann fljúgi semsagt heim á föstudaginn og ef veðrið verður gott þá skellum við okkur líklega eitthvað í útilegu bara

Jæja, ég læt þetta dug í bili. Eins gott að maður vinni fyrir laununum sínum líka

Fór til læknis...

... Og hann sagði allt ágætt bara...
Skjaldkirtillinn er í fínu lagi en sökkið var of hátt
"Hvað er sökk" spurði ég og fékk myndræna útskýringu og mjög flotta.
Sökkið virkar svona:
Blóð er sett í tilraunaglas. Svo er það látið standa í klukkutíma og á þeim tíma sökkva rauðu blóðkornin niður á botninn. Mismunurinn á blóðvökvanum og blóðkornanna er sökkið og ef það er of hátt þá getur verið að maður sé veikur á einhvern hátt.
Ég hef ekki verið veik en er alltaf með ógeðslegan hósta og þetta gæti tengst því.
Ég á því að fara á sýklalyfjakúr í 3 daga og svo í blóðprufu á næsta föstudag og ef sökkið verður aftur of hátt þá ætlar hann að setja mig á sterakúr!!!
Ég kemst að því á fimmtudaginn í þarnæstu viku, 26. júní en þá á ég tíma aftur hjá doksa.
Maður fer að hafa áhyggjur af því að yfirmaðurinn sé ekkert alltof hrifin af því að ég sé alltaf hjá lækni... Liggur við að maður skammist sín fyrir að vera alltaf að stinga svona af...
Vona bara að þetta verði til þess að hægt sé að komast að því hvað hrjáir mig... Ég er alltaf svo þreytt og slöpp eitthvað.

Niðurstaðan; ég er með heimilislækni sem gerir eitthvað og ætlar að finna hvað er að mér og það er alltaf bót í máli

Góða helgi og gerið eitthvað skemmtilegt í góða veðrinu

Skyldi ég hafa verið þreytt í morgun?

Ég vaknaði í morgun og var frekar þreytt og mygluð.
Ekkert nýtt svosem svo ég var ekkert að stressa mig neitt.
Gerði mig klára og vakti Ástrós Erlu og gerði hana klára líka.
Fór inn í eldhús til að borða og fyrsta hugsunin var:
"Mig langar ekki í Corn Flakes".
Svo ég ákvað að elda mér hafragraut.
Setti vatn og smá salt í pott. Fattaði svo þegar vatnið var að byrja að sjóða að ég hafði gleymt að setja haframjölið í pottinn út í vatnið þegar það var kalt.
Taldi það ekki koma að sök svo ég skellti haframjölinu út í og hrærði í.
Þegar grauturinn var tilbúinn setti ég hann á diskinn en fannst hann frekar lítill og aumingjalegur.
Smakkaði á honum og oj!!!! Hann smakkaðist eins og söltuð steinsteypa
Ég hellti honum niður og ákvað að búa mér til aðra brauðsneið (var búin að smyrja eina með smjöri og osti). Náði í ostinn inn í ísskáp og tók hann úr plastpokanum, setti smjör á brauðið og setti svo ostinn aftur í pokann og gekk frá honum!!!
Ég fór næstum því að grenja!!! Það gekk allt á afturfótunum hjá mér...
Þessu var snarlega reddað og ég skellti brauðsneiðinni ofan á hina brauðsneiðina og bjó til samloku
Hún var svo borðuð í bílnum á leiðinni í vinnuna og ég er svo með peru til að borða í kaffinu

Jæja...

... Er ekki kominn tími á smá blogg?
Ég er víst ekki eins dugleg við að blogga og ég hélt að ég myndi vera...
Vonandi batnar það með tímanum samt

Þar sem við búum í Hafnarfirði þá tókum við að sjálfsögðu þátt í 100 ára afmæli bæjarins!!!
Það var margt um manninn og nóg við að vera fyrir bæði unga sem aldna og ég held að allir sem hafi lagt leið sína í bæinn hafi getað fundið eitthvað við sitt hæfi
Við fórum í bæinn bæði á laugardeginum og á sunnudeginum og smökkuðum að sjálfsögðu á 100 metra löngu afmælistertunni og hún kom mér skemmtilega á óvart verð ég að segja. Fallega skreytt og ótrúlega bragðgóð kaka.
Ástrós Erla var alveg með á því að Hafnarfjörður ætti afmæli og var því klædd eins og Solla Stirða í tilefni dagsins:

Síðasta sunnudag fórum við svo með afa í sunnudagsbíltúr / ísbíltúr.
Við byrjuðum á því að fara með afa upp í Gufuneskirkjugarð að leiðinu hennar Huldu ömmu. Þaðan fórum við svo í Garðabæ til að kaupa ís og keyrðum svo út að Víðistaðavatni þar sem við fórum aðeins út og nutum góða veðursins (og roksins).
Þar tók ég þessa mynd af Viðari mínum, sem mér finnst bara nokkuð flott:

Á sunnudagskvöldið fékk ég svo símhringingu frá Ingunni vinkonu.
Hjá henni var stödd lítil Papillon tík (fiðrildahundur) sem heitir Button og greyið var því sem næst heimilislaus
Þar sem að við meigum ekkert aumt sjá þá ákváðum við að veita henni húsaskjól að minnsta kosti þangað til í byrjun júlí þegar að við förum út.
Hérna er mynd af henni Button:

Annars styttist í það að við förum til Svíþjóðar.
Það verður gaman að fara og hitta Mathias stóra bróður og eins Therese mágkonu en þau eru að fara að gifta sig þann 5. júlí næstkomandi

Þangað til næst.
Kveðja, Hulda.

Myndir af Ástrós Erlu

 

Nýfædd þann 10. apríl 2004: 

1. árs:

2. ára:

3. ára:

4. ára (mynd tekin á Öskudag):

Ég er auðvitað svakalega hlutdræg en hún er virkilega fallegt barn

Afmælisprinsessa!!!

Í dag, 10. apríl á hún Ástrós Erla Markhus Viðarsdóttir, dóttir mín, afmæli
Hún er orðin 4. ára gömul og mér finnst það svo skrítið. Finnst eins og hún hafi fæðst í gær bara og í dag er hún orðin svo stór...
Við Viðar fórum inn til hennar í morgun kl. 6.30 og vöktum hana með afmælissöng og pökkum. Pökkuðum gjöfinni hennar inn í 2 pakka og band utan um og svo helíumblaðra bundin við pakkann líka
Þetta fannst henni æðislegt og hún var svakalega ánægð með gjöfina frá okkur.
Við keyptum handa henni fleecepeysu, 2 leggingsbuxur, sumarkápu með Dóru, Dórusandala og Fríðu barbídúkku.
Við fórum svo með hana í leikskólann þar sem bíður hennar að baka afmæliskökuna sína og halda upp á daginn með Kanínudeildinni á Víðivöllum.
Hún er svo búin að ákveða að kvöldmaturinn í kvöld verður píta með tilheyrandi meðlæti og eftirréttur sem mun að öllum líkindum verða ís ef ég þekki dóttur mína rétt
Hún bíður svo spennt eftir því að fá fleiri pakka en mamma mín á eftir að koma með gjöf til hennar seinnipartinn í dag
Ég skal svo setja inn mynd af prinsessunni fljótlega.

Fjölbýlishús í Noregi hrynur...

Þar sem að ég hef nú norskt blóð í æðum þá fylgist ég alltaf með fréttum frá Noregi.
Mér brá ekki lítið í morgun þegar að ég heyrði fréttirnar af fjölbýlishúsinu í Ålesund. Og húsið er bara 5 ára gamalt!!!
Nú er ég búin að vera að skoða heimasíðu Verdens Gang (dagblaðsins sem pabbi minn vann hjá) og þar kemur fram að líklega hafi grjóthrun valdið þessu til að byrja með og það var um kl 4 í nótt að norskum tíma (kl 5 hjá okkur). Grjóthrunið olli því að öll fyrsta hæð blokkarinnar og hluti af annarri hæðinni hrundu saman, blokkin hefur lækkað um 6-8 metra að minnsta kosti. Og til að toppa allt þá hefur öll blokkin færst fram á við um einhverja 8-10 metra!!! Samt var búið að setja bolta í fjallið til að koma í veg fyrir grjóthrun... Það hefur greinilega ekki virkað sem skyldi. Húsið stóð í brattri fjallshlíð, eitthvað sem ég held að Íslendingar myndu aldrei gera...
Fólki er sagt að halda sig sem lengst frá húsinu vegna þess að hætta er á að það eigi eftir að hrynja ennþá meira og svo er Própantankur í húsinu!!! Guð má vita af hverju...

Fjölbýlishús hrundi í Noregi

Bananamuffins

Já, ég bakaði Bananamuffins á miðvikudaginn og notaði uppskrift sem ég fékk á einhverju blogginu á netinu. Þvílíkt góð uppskrift og ég er að hugsa um að deila henni með ykkur.

Bananamuffins

3 bananar í bitum
200 gr sykur
125 gr smjör
3 egg
1 tsk vanilludropar
1/4 tsk salt
1 tsk matarsódi
1 tsk kanill
250 gr hveiti

Bananar, sykur, smjör, egg og vanilludropar eru settir í skál og hrært vel saman.
Öðrum efnum er bætt út í og hrært vel þangað til að blandan er nokkuð slétt (verður samt alltaf bananakekkir í henni).
Sett í muffinsform og bakað við 180°c í 10-15 mínútur.

Helgin er liðin...

... Og eins og venjulega fannst mér hún vera alltof stutt!!!
Hefði svo sannarlega verið til í að hafa hana lengri en svona er þetta nú bara...
Helgin varð nú ekki eins róleg eins og ég hefði viljað hafa hana.

Viðar fór á föstudagskvöldið í vinnupartý (það eru alltaf vinnupartý hjá Icelandair) og Ástrós Erla fór upp á efstu hæð til að leika við vin sinn, Patrik. Hún kom niður um kl 21 og fór þá beint í bólið og sofnaði fljótlega enda orðin dauðþreytt eftir daginn og vikuna.
Ég skreið svo í bólið kl 23 enda alveg búin á því sjálf eftir vikuna.
Ástrós Erla skreið upp í rúm til mín um kl 23.30 og ég hugsaði með mér að Viðar myndi bara geta fært hana þegar að hann kæmi heim. Hún var eitthvað óróleg en róaðist eftir að vera búin að fara á klósettið og pissa smá. Stuttu seinna varð hún aftur óróleg og svo kl 00.30 byrjaði ballið...
Hún byrjaði að gubba eins og ég veit ekki hvað. Það fóru 2 gusur í hjónarúmið, 1 gusa á gólfið fyrir framan klósettið, 1 gusa á gólfið á klósettinu og restin í klósettið!!! Það varð bókstaflega allt útælt, svo ekki sé meira sagt. Eftir að hún var búin fór ég með hana í sitt rúm og svo hófust þrifin og skolunin á handklæðum og lökum. Ég hringdi í Viðar og lét hann vita en sagði honum að hann mætti vera rólegur ennþá. Þegar klukkan var orðin 01.30 þá byrjaði ballið aftur en sem betur fer fór allt í fötuna sem var komin við rúmið hennar. Ég hringdi svo í Viðar og bað hann að koma heim, sem hann gerði.

Við skriðum upp í rúm um kl 2 (um leið og Viðar kom heim) og sofnuðum. Kl 3 byrjaði Ástrós Erla aftur að gubba svo ég rauk aftur framúr og til hennar. Ég var varla komin upp í rúm aftur þegar að Viðar ákvað að það væri nú líklegast best að vera dóttur sinni til samlætis svo hann fór að æla líka...

Á þessum tímapunkti var ég ekki viss um það hvort ég ætti að hlæja eða gráta... Mér fannst þetta eiginlega vera komið nóg en þeim feðginum fannst það greinilega ekki. Ég auðvitað rauk á fætur til að hjúkra manninum mínum og ná í vatn fyrir hann og annað slíkt og koma honum svo í rúmið aftur.
Ástrós Erla skreið svo upp í rúm til okkar og um kl 5 bætti hún við einnu gusu sem fór að mestu í klósettið en líka smá á gólfið á leið á klósettið og smá í rúmið okkar. Fjölskyldan sofnaði svo og svaf til hálf 10, enda ekki vanþörf á eftir svona svakalega nótt.

Laugardeginum eyddum við svo bara í slappleika enda engin orka til í líkömum okkar eftir nóttina. Við misstum sem sagt af þessu geggjaða veðri sem var á laugardaginn.
Restin af helginni var samt tiltölulega róleg.

Við fórum í smá afmælisleiðangur í gær með Ástrós Erlu og mamma fékk að fljóta með.
Það styttist víst í afmælið hennar Ástrósar Erlu og við höfum ekki grænan grun um hvað við eigum að gefa barninu!!! Henni vantar ekki neitt sérstakt og hún á nóg af öllu þannig að við erum frekar tóm.

Annars þá var ég ansi dugleg að skrappa um helgina. Gerði 3 síður og er svo með 1 opnu sem er ekki alveg tilbúin en ég ætla að reyna að klára hana í kvöld ef ég hef orku til.

Over and out...